ObjekBerita.Id – Tondano. Tim RESMOB POLRES MINAHASA kase aman tu orang caparuni kase lia dia pe barang pa banyak orang di stadion MAESA waktu itu hari Senin (23/06/2024).
Laki laki depe inisial NGP (31), orang Desa Kembuan, Kecamatan Tondano Utara, langsung petugas Tim Resmob Polres Minahasa kase aman pa dia hari Senin malam sekitar jam 21.30 WITA, karena depe kalakuan caparuni itu.
Tim yang pi tangka yang pimpin Kanit Resmob, Aipda Suryadi SH, depe awal karena video yang so beredar di media sosial Facebook yang depe gambar kase lia ni laki laki pe aksi caparuni kase lia depe barang padahal disitu banyak parampuang lagi ba olahraga di kawasan Stadion Maesa, Tondano.
Di video pertama kali dorang kase di medsos yang depe nama Shrn Cei Lanur, di video itu dapa lia tu pelaku ada di tribun di stadion kong dia buka calana kong ja kase lia depe barang pa orang orang apalagi disitu paling banyak katu parampuang yang lagi ba olahraga sore di lokasi itu. Aksi ini jadi sekitar jam 15.00 WITA dan warga dilokasi itu yang rekam.
Karena dapa laporan dan bukti video ini kong Tim Resmob langsung ba gra kong pi loku ni tuama caparuni pa depe rumah di Desa Kembuan. Pelaku skarang so di Mako Polres Minahasa dan so diserahkan pa penyidik for mo proses hukum.
Pihak kepolisian lebe khusus Kapolres Minahasa AKBP Stevent J.R. Simbar, S.I.K., selalu ja kase inga katu pa orang orang for selalu ba jaga jaga dan langsung ba lapor kalo da lia yang nyanda bagus yang melanggar hukum deng melanggar depe sopan santun. (HenceKaramoy)
Dengar Info ada Orang Caparuni Di Stadion Maesa Tim Resmob Polres Minahasa Langsung Pigi Loku Depe Orang
